Katibu Mkuu Yonaz aagiza DART kutumia teknolojia inayotokana na tafiti za ndani
Aitaka DART kushirikiana na vyuo vikuu kubuni mabasi yanayolingana na mazingira ya Tanzania
Kamati Maalum ya Makatibu Wakuu imeuagiza Wakala wa Mabasi Yaendayo Haraka (DART) na wadau wake kutumia teknolojia inayotokana na tafiti za ndani katika kubuni na kuendesha mabasi katika mfumo wa DART.
Maelekezo hayo yametolewa na Mwenyekiti wa Kamati hiyo, Dkt. Jim Yonaz, Katibu Mkuu anayeshughulikia Sera, Bunge na Uratibu katika Ofisi ya Waziri Mkuu – TAMISEMI, wakati wa ziara ya ukaguzi katika Awamu ya Kwanza na ya Pili ya mradi huo.
Kamati imeanza ukaguzi katika Kituo cha Kivukoni, Kimara Mwisho, Barabara ya Morogoro, kukagua maendeleo ya ukarabati wa miundombinu ya BRT iliyoharibiwa wakati na baada ya matukio ya uchaguzi wa Oktoba 2025.
Baadaye ujumbe ulielekea Kituo na Karakana ya Mbagala katika Awamu ya Pili, kukagua mabasi mapya 100 ya UDART yaliyokusudiwa kuhudumia Awamu ya Tatu kwa Kipindi cha Mpito katika Barabara ya Nyerere.
Akizungumza wakati wa ziara hiyo, Dkt. Yonaz alisisitiza kuwa licha ya umuhimu wa teknolojia kutoka nje, Tanzania inapaswa kuimarisha matumizi ya tafiti za ndani katika kuamua aina ya mabasi na mifumo ya uendeshaji.
“Ni lazima teknolojia tunayotumia izingatie hali ya hewa yetu, mazingira ya barabara zetu, tabia za wasafiri wetu na uwezo wetu wa matengenezo,” alisema.
Aliitaka DART, UDART na MOFAT kushirikiana kwa karibu na vyuo vikuu na taasisi za utafiti nchini ili kubuni suluhisho za usafiri zinazolingana na mazingira halisi ya Tanzania.
Alieleza kuwa matumizi ya maarifa ya ndani yataongeza uendelevu wa mradi, kupunguza gharama za uendeshaji na kujenga uwezo wa kitaifa katika ubunifu wa sekta ya usafiri wa umma.
Kamati ilisisitiza kuwa maamuzi kuhusu usanifu wa mabasi, mifumo ya mafuta na teknolojia ya uendeshaji yanapaswa kuongozwa na ushahidi wa tafiti za ndani.
Mtendaji Mkuu wa DART, Bw. Said Tunda, aliahidi kutekeleza maelekezo hayo na kuimarisha uratibu kati ya wadau wote wa mfumo wa DART.
Aliongeza kuwa kuondoa daladala katika njia za Mabasi Yaendayo Haraka kutafanyika kwa utaratibu mzuri kwa kuzielekeza katika maeneo yasiyo na huduma ya BRT ili kuepusha usumbufu kwa wananchi.
Akihitimisha ziara hiyo, Dkt. Yonaz aliahidi kuitisha mikutano na ziara nyingine katika siku zijazo ili kufuatilia maendeleo na kuhakikisha maboresho endelevu ya mfumo wa Mabasi Yaendayo Haraka jijini Dar es Salaam.